GENERAL SANTOS CITY – Miusbaw ang natala nga tourist arrivals dinhi sa dakbayan.
Kini ang gibutyag sa Bombo Radyo ni Cora Tito sa City Tourism Office, kung asa mukabat sa 1.5 milyon ang turista nga mibisita dinhi sa siyudad alang sa 2017.
Gikabutyag nga 18 percent kining mas taas, itandi sa 1.3 milyon nga tourist arrivals kaniadtong 2016.
Bisan paman, gibutyag ni Tito nga itandi sa mga langyaw nga turista, mas daghan gihapon ang mga local kon mga Pinoy nga turista nga miduaw dinhi sa siyudad.
Kini gumikan dili matud pa malimod nga naapektuhan gayud ang pagbisita sa mga langyaw nga turista, hilabi na human sa martial law declaration sugod kaniadtong Mayo miaging tuig.
Base matud pa sa ilang data, nanguna gihapon ang mga Amerikano nga may 1,751, nga mas ubos itandi sa 1,894 kaniadtong 2016.
Sunod ang mga taga-South Korea nga may 1,187 nga miusbaw gikan sa 1,098 kaniadtong 2016; mga Chinese-905 tourist arrivals gikan sa 934; mga Hapon-892 gikan sa 1,040 kaniadtong 2016, dayon ang mga Australian nga mukabat sa 555 tourist arrivals gikan sa 759.
Dugang pa ni Tito nga problema gihapon ang stigma nga basta Mindanao, daw sa lain ang impresyon sa mga turista hilabi na sa mga langyaw.
Hinungdan nga giawhag niini ang publiko nga likayan o kunhuran ang pag-post ug mga dili maayong impormasyon kalabot sa Gensan, inay i-promote kadtong mga maayong butang ug lugar, gumikan kita gihapon ang makabenepisyo niini
