GENERAL SANTOS CITY – Hugtanong nagpahimangno ang taga-Department of Foreign Affairs (DFA) may kalabutan sa nahimong katap karon nga modus sa mga sindikato sa online nga renewal sa passport ug pagpa-appointment sa ilang buhatan pinaagi sa internet.
Kini human may gikataho nga may pipila nga gapaningil ug salapi bugti sa assistance o tabang sa pagpa-appointment sa DFA, nga dili muubos sa P2,500 ang singil sa matag slot sa appointment.
Matud sa labaw sa DFA-GenSan nga si Yvonne Mofar, walay bayad ang magpa-appointment sa ilang buhatan. Wala usab matud pa silay accredited nga travel agency nga magtanyag ug susamang serbisyo gumikan gibawal na.
Sumala pa nga ang susamang modus ang sagad nga hinimuan sa mga hackers ug IT expert, kung asa nagpatabang na ang DFA sa National Bureau of Investigation (NBI) aron matultulan ang mga nahisgutang hackers.
Kahibaluan nga may na-contact ang Bombo Radyo nga may susamang negosyo, nga nagkanayon nga wala na sa maong trabaho, ug ang iyang higala na lamang, kung asa aduna pay 1,500 slots nga gitanyag alang ning bulana.
