GENERAL SANTOS CITY – Gikuha na sa tagtungod ang patayng lawas sa usa ka NPA member nga napatay sa natigayong engkwentro tali sa mga rebelde ug tropa sa gobyerno sa Brgy Little Baguio, Malita, Davao Occidental aging adlaw.
Kini ang gikumpirma ni Lt. Daryl Cansancio, tigpamaba sa 73rd Infantry Battalion Philippine Army kon asa sumala sa nasampit, pipila ka adlaw nga walay claimant sa maong NPA member apan niadtong Dominggo sa hapon mipatim-aw sa punerarya si Loreto Diali, kanhing konsehal sa Malapatan og nagpailang kabanay.
Giila niini ang patayng lawas sa NPA nga si Jimmy Tumbo, 22, taga Sitio Akbual Upper Suyan Malapatan Sarangani.
Ug gani, gidala na sa ilang balay ang patayng lawas sa nasampit nga miembro sa walhong grupo.
Kahibaluan nga ang natigayon nga engkwentro sa Brgy Little Baguio, Malita gumikan matud pa sa mga report nga padayon ang kalihukan didto sa mga rebelde partikular na sa Guerrilla Front 71 ilawom kang Alyas Dong, sama sa extortion ug pagpang-harass.
Ug gani, gikabutyag may mga gagmay’ng tindahan ang gipanglungkab sa mga rebelde.
Gikabutyag nga Huwebes dihang natigayon ang 20 minutos ang engkwentro, kung asa napatay ang nasampit nga rebelde.
