GENERAL SANTOS CITY – Hustisya ang singgit sa pamilya ni Arcelito Agan human nga gidunggab kini sa kanhi kapuyo sa iyang kalive-in partner sulod sa ilang panimalay sa Prk San Vicente, Brgy Baluan ning dakbayan.
Matud pa ni Alma Agan, asawa sa biktima, napasakaan na ug kasong murder ang suspek nga si Jomar Del Carmen Alyas Totong.
Nanghinaut ang nasampit nga makonsensiya ang suspek og musurender sa kapulisan aron mahatagan og hustisya ang kamatayon sa bana.
Gibutyag niini nga plano usab nga mupasaka og kasong frustrated murder ang kapuyo sa iyang bana nga si Gemma Manggoy nga nagpabilin pa sa ospital human nga giapil og dunggab sa suspek.
Nasayran nga si Manggoy ang kanhing kapuyo sa suspek.
Samtang, gibutyag sa laing kabanay sa biktima nga si Agan nga dili siya makasulti kon unsay iyang mabuhat sa suspek ugaling kini madakpan.
Nanganti nga mubalos gayud sa brutal nga pagpatay sa biktima human nga nakaangkon ug lima ka samad dinunggaban sa lawas nga hinungdan sa iyang kamatayon.
Kahinumduman nga kaniadtong Mayo 22 sa kaadlawon, dihang gisulod sa suspek ang balay sa mga biktima og gipangdunggab ang mga nasampit gamit ang kutsilyo kon asa namatay si Agan apan swerte nga nakaikyas ang kapuyo nga si Manggoy.
