GENERAL SANTOS CITY- Hugtanong gikondena sa militar ang gihimong pagpamanhig sa mga New Peoples Army sa lima ka pulis kagahapong adlawa sa Brgy Sibayan Bansalan Davao Del Sur.
Kini ang rason nganong naglusad karon ang militar ug all-out nga hot pursuit operations batok sa mga rebelde sa lugar, hilabi na batok sa mga responsable sa pagpang-ambush, nga kahibaluan nga gikamatay sa upat ka pulis, ug gikaangol sa laing usa.
Matud ni Lt. Daryl Cansancio, tigpamaba sa 73rd Infantry Battalion Philippine Army, dili kadto makatarunganon, hilabi na nga miadto lamang sa lugar ang mga biktima nga pulis dili alang sa pagpahigayon ug operasyon, inay alang lamang sa pagresponde sa usa ka insidente sa pagpamusil.
Nasayran nga ang ga-operate nga grupo sa nasampit nga lugar mao ang NPA Guerilla Front 51 ilawom sa pagdumala ni Alyas Joma.
Tungod sa panghitabo, nanganti si Lt. Cansancio nga andam na ang militar nga gamiton ang tanan nilang pwersa ug capabilities, gikan sa artillery units ngadto sa mga air assets, alang sa paggukod sa mga rebelde sa lugar, katambayayong ang PNP sa nagpadayong hot pursuit operations sa lugar.
