GENERAL SANTOS CITY – Mukabat sa P2.5 million nga kantidad sa iligal nga droga ang kinatibuk-ang nakumpiska sa Philippine Drug Enforcement Agency kon PDEA-12 gikan sa bulan sa Enero hangtod Pebrero ning tuiga.
Base kini sa gipagawas nga accomplishment report sa nahisgutang buhatan, human ang 33 matud pa ka operasyon nga ilang napahigayon sa nahisgutang panahon.
Base sa nahisgutang report, mukabat sa 301.5 ka gramo sa shabu ang nakumpiska, samtang unom ka kilo sa marijuana nga nagresulta sa nahisgutang kantidad.
Una nang gipaniguro sa PDEA-12 sa pagpanguna sa ilang bag-ong laabw nga si Dir. Gil Castro nga wala silay santuhon sa ilang mas gipakusgan nga kampanya batok sa iligal nga droga.
Ug gani, giangkon sa nasampit nga opisyal nga lakip ang pipila ka pangalan sa mga mayor, mga opisyal sa barangay ug sa kapulisan mismo sa Rehiyon 12, ang ilang gihuptan ug kasamtangang gimonitor gumikan sa gikabutyag nga pagkalambigit sa iligal nga droga.
Kini luyo nga mibalibad una nga panganlan ang mga nasampit gumikan sa padayon nilang pagpangalap ug impormasyon ug ebidensya aron pamatud-an ang kasamtangan nilang gihuptan nga mga impormasyon.
