GENERAL SANTOS CITY -Kapin tunga sa milyon nga kantidad sa shabu, drug paraphernalia, ug ubay-ubay ka mga armas, granada ug buhing bala lakip cash ang nakumpiska sa Philippine Drug Enforcement Agency kon PDEA-12 sa labing ulahing gipatuman nga search warrant operation sa rehiyon.
Kini human nila gisulod ang panimalay sa ilang target nga tindero sa barbeque nga usa usab ka high value target, alas-9:00 kagahapon sa buntag sa Purok Tagumpay, Barangay GPS, Koronadal City, South Cotabato.
Giila ang dinakpan nga si Franklin Binyas Alias KANO, 51 anyos, minyo ug residente sa nasampit nga lugar.
Nakumpiska sa posisyon sa nahisgutan ang pito ka dagkong sachet sa shabu nga may gibug-aton nga 75 gramos ug may estimated value nga P562,500, usa ka gamay’ng sachet sa shabu nga may suspected shabu residue, ubay-ubay ka mga drug paraphernalia, upat ka cellphone, usa ka caliber .45 pistol, tulo ka magazines nga may unod nga mga buhing bala, usa ka caliber .380 revolver ug 11 ka rounds sa bala niini, upat ka rounds sa bala sa caliber .45, lima ka rounds sa bala sa caliber .38, tulo ka rounds sa bala sa caliber 22, usa ka inside holster, duha ka hand grenade, usa ka grenade canister ug cash nga P48, 140.
Nasayran nga ang dinakpan ang usa ka iladong supplier sa droga sa Koronadal, ug matag adlaw’ng Dominggo lamang matud pa gapahigayon sa iyang iligal nga gimbuhaton aron makalikay sa mga otoridad.
Sa pagkakaron balhug na ang nasampit nga dinakpan sa PDEA RO12 Detention Facility, ug nag-atubang ug kasong Section 11 kon paghupot, ug Section 12 kon paghupot ug Drug Paraphernalia sa Article II sa Republic Act 9165 kon Comprehensive Dangerous Drugs Act of 2002 ug Republic Act 10591 kon Illegal Possession of Firearms and Ammunition.
