Nakarekord og duha ka Guinness World Records ang 97-anyos nga si Betty Bromage sa United Kingdom human siya misulay og wing walking ug miapil usab sa loop-the-loop maneuver samtang anaa sa kahanginan.
Nakuha ni Bromage ang titulo nga “oldest wing walker, female” ug “oldest person to perform a loop-the-loop wing walk, female” sa edad nga 97 anyos ug 123 ka adlaw.
Ang wing walking usa ka stunt diin ang usa ka tawo motindog o magpugong sa iyang kaugalingon ibabaw sa pakpak sa usa ka eroplano samtang kini naglupad.
Gihimo ni Bromage ang stunt niadtong Agosto 4 sa usa ka airfield sa Cirencester, Gloucestershire, aron makatigom og pondo alang sa Cheltenham Gloucester Hospitals Charity.
Dili na bag-o kang Bromage ang wing walking tungod kay nakakuha na siya sa iyang unang world record niadtong 2022 sa edad nga 93 anyos.
Nakasulay usab siya og ubang extreme activities sama sa zipwire ug abseiling, ug wala pa siya nagplano nga moundang bisan pa sa iyang edad.
Matod ni Bromage, mas importante nga tutukan ang mga butang nga mahimo pa niya kaysa sa mga butang nga dili na niya kaya, ug posible pa siyang mosulay pag-usab og wing walking kung makaabot siya sa edad nga 100 anyos.
