Kapin sa katunga sa mga Pilipino ang miila sa ilang kaugalingon nga nagpuyo gihapon sa kakabus.
Sumala sa pagtuon gikan sa September 14-23, 2024 survey nakit-an nga 59% sa mga pamilya ang nag-rate sa ilang kaugalingon nga kabus.
Mas taas kini ug usa ka porsyento itandi sa 58% sa bulan sa Hunyo 2024 nga survey ug ang labing taas nga porsyento kon itandi sukad Hunyo 2008.
Matod sa pagtuon, ang self-rated poverty misaka sa Metro Manila, may pagsaka usab sa Balance Luzon, may pag us-os gamay sa Visayas ug Mindanao.
Apan sa kinatibuk-an, ang self-rated poverty pinakataas sa Mindanao nga anaa sa 67%, gisundan sa Visayas sa 62%, Balance Luzon sa 55%, ug Metro Manila sa 52%.
Nasuta usab nga ang median monthly expenses sa usa ka pamilya sa abang sa balay anaa sa P3,000, transportasyon paingon sa trabaho ug eskwelahan anaa sa P2,000, internet P1,000, ug mobile phone load anaa sa P400.
Ang labing taas nga median monthly expenses sa abang sa balay mao ang Metro Manila nga anaa sa P3,500, gisundan sa Balance Luzon sa P3,000, Visayas sa P2,250, ug Mindanao sa P1,500.
