SARANGANI – Anaa sa hugot nga pagbantay sa mga otoridad ang 37 ka drum sa gituhuang sodium cyanide nga narekober sa gipahigayon nga Joint Operations.
Ang mga pwersa sa Gensan City Maritime Police Station, 5th Special Operations Unit-Maritime Group, BFAR-12-Enforcement and Regional Monitoring, Control and Surveillance Operations Center ( ERMCSOC), Municipal Environment and Natural Resources Office Maasim, Maasim Municipal Police Station kauban sa pipila ka Opisyal sa Barangay maoy gitahasan sa maong nakumpiska nga butang.
Kini human nakadawat ug impormasyon ang mga otoridad gikan sa usa ka concern citizen nga nakakita sa kamada sa mga drum nga gisudlan sa sodium cyanide nga nahimutang sa usa ka pribado nga beach resort sa sa Tinoto, Maasim nga nagresulta sa pagkakompiska niini.
Matud sa mga otoridad nga ibiyahe na unta padulong sa Sarangani, Davao Occidental ang cyanide agi sa kadagatan nga may market value nga P1,628,000.00.
Ang sodium cyanide ang makahilo ug makadaut sa kadagatan kini tungod usa ka matang sa hilo.
