GENERAL SANTOS CITY – Nakadawat ug cash assistance ug tig usa ka sako sa bugas gikan kang Gensan Mayor Lorelie Pacquiao ang 31 ka pamilya nga nasunogan sa Tindalo Lagao ug Purok Crisostomo, Barangay Calumpang ning syudad .
Adunay midawat ug singko mil ka pesos samtang kadtong biktima nga naugdaw ang panimalay ang midawat ug kinse mil pesos.
Mismong ang Mayor ang mitunol sa hinabang pinansyal sa Mayor’s Conference Room miaging adlaw.
Mensahe usab sa Mayor sa mga nasunogan nga magpadayon sa pagpangita ug mga paagi aron maatiman ang mga panginahanglanon sa mga mangayu ug tabang sa gobyerno.
Gitambagan usab sa Mayor ang mga nahisgutan nga mudangop sa buhatan Congressman Atty. Loreto Acharon aron madugangan ang nadawat nga hinabang.
Gidasig usab niini ang mga nahisgutan nga mu apply sa livelihood assistance programs gikan sa local government unit kauban ang mga nasudnong ahensya.
Gawas sa hinabang gikan sa LGU nakadawat ug laing hinabang ang mga nasunogan gikan sa Department of Social Welfare and Development.
Kahinumduman nga pito ka balay ang hingpit naugdaw sa sunog nga natigayon sa Purok Crisostomo, Calumpang desperas sa bag-ong tuig samtang laing mga balay usab ang nasunog kaniadtong martes sa Tindalao Lagao gumikan sa gidagkutan nga kandila sa paghinumdum sa kabanay nga namatay.
