Gikompirma ni Japan Prime Minister Sanae Takaichi nga misaka na sa 30 ang gidaghanon sa mga namatay tungod sa kusog nga magnitude 6.8 nga linog nga miigo sa habagatan-kasadpang bahin sa Japan.
Samtang, nagpadayon gihapon ang mga rescuers sa pagpangita sa mga posible pang naluwas sa linog nga miigo sa Kumamoto Prefecture sa Kyushu niadtong Martes, Hulyo 28.
Kadaghanan sa mga namatay mga Hapon, lakip ang usa ka lungsoranong Vietnamese, samtang 62 pa ka indibidwal ang naangol.
Pipila sa mga namatay mga empleyado sa AEON Shopping Centre Kashima, diin ang pipila ka bahin sa establisemento naguba ug gisundan og pagbuto usa ka oras human sa linog nga maoy hinungdan sa dugang kadaot sa mall.
Matud sa presidente sa shopping center, posible nga gas explosion ang hinungdan sa pagbuto, apan padayon pa nga giimbestigahan sa mga otoridad ang tinuod nga hinungdan niini.
Mikabat usab sa 9,000 ka residente ang nabakwit ug karon nagpabilin sa mga evacuation center, bisan pa og giatubang nila ang hagit sa init nga panahon sa maong rehiyon.
Kapin 30,000 ka panimalay usab ang naputlan og kuryente niadtong Miyerkules human sa linog.
Samtang, nakatala na og kapin 100 ka aftershocks sukad sa pagtay-og sa kusog nga linog.
