Gihikap ang kasing-kasing sa mga tawong nakakita ug nakabasa sa nag-viral nga istorya sa milagrong pagkaluwas sa usa ka 3-anyos nga batang babaye, pila ka oras lang human ang kalit nga pagbaha nga mikalas na og kapin sa 100 ka mga tawo apil na ang mga batang nag-camping sa Kerr county.
Nasayran nga apil ang bata sa gipangita sa iyang mga kabanay ug sa mga rescuers human ang pagbaha kon diin inanay nga nawala ang paglaum dihang mingitngit na ang palibot apan wala gihapon makita si alyas ‘Dolly.’
Hangtud nga miabot ang mga rescuers dihang lawom na ang kagabhion ug sa ilang pagsuhid sa mga lugar nga dunay daghang lapok ug kahoy nga nagtapok, didto nakita ang bata nga naputos sa lapok, nagkurog, ug naghilak nga nagtago ilawom sa nahugno nga payag nga layo sa ilang balay.
Buhi siya apan wala siya nag-inusara tungod kay tapad man kaniya ang basa usab kaayo ug nagkurog pa sa katugnaw nga iro nga walay nakaila.
Dihang gibandilyo ang milagrong kaluwasan sa bata, nasuta nga dili kini iro sa ilang pamilya ug wala usay nakaila sa mga silingan kansa sigon sa emergency responders, wala gyud mubiya ang maong misteryosong iro sa kiliran sa bata kon diin siya ang gigakos niini gikan sa hangin ug katugnaw, nagpabilin nga duol taliwala sa bagyo, ug nasuta nga siya pa ang nangita ug masilungan ilawom sa payag, ang nag-inusarang estruktura nga wala maguba.
Walay nakahibalo kung asa kini gikan rason nga gitawag siyang ‘guardian angel’ tungod sa kalit niyang pagtunga sa tukmang higayon, ug wala mibiya hangtod nga naluwas na ang bata.
Karon, naayo na ang batang babaye ug ang komunidad naningkamot nga ampingan ug sagupon ang maong iro nga gikonsidera nila nga bayani apan didto kini nagpuyo sa balay sa batang si Dolly uban sa iyang ginikanan.
