GENERAL SANTOS CITY – Gilayon nga nag-aksyon ang LGU GenSan sa mga naapektuhan sa kusog nga pag-ulan og paghapak sa balod sa syudad sa miaging mga adlaw.
Matud pa ni Dr. Bong Dacera labaw sa City Disaster Risk Reduction and Management Office o CDRRMO nga 25 ka pamilya ang gibalhin sa Guardian Hill sa Bawing sa kooperasyon sa City Housing og sa National Housing Authority kon NHA.
Sa pamahayag ni Dacera nga mga residente ang kasagaran gikan sa Purok San Vicente, San Roque og San Juan sa Barangay Dadiangas West nga naapektuhan sa paghapak sa kusog nga balod og pag-ulan sa miaging mga adlaw.
Sa pamahayag ni Dr. Dacera nga nalipay ang mga nasampit gumikan adunay kaugalingong balay na gawas pa nga dili na usab masinatian ang maong panghitabo.
Ang usa sa mga kondisyon nga gihatag nga dili ihatag ang resettlement kung dili gubaon ang ilang balay.
Kahibaluan nga daghang mga barangay sa syudad ilabi sa mga anaa sa coastal areas ang naapektuhan sa pagbaha og pagdako sa tubig balod sa miaging mga adlaw.
Ang area sa Amao Road padulong sa Gensanville ang wala gilayon nahubas ang tubig baha.
Gumikan niini ang LGU ang nagpadala og duha ka bus og laing mga sakyanan alang sa libreng sakay aron makatabok ang katawhan nga dili mabasa.
