Gikumpirma sa Department of Migrant Workers (DMW) nga mupauli sa Pilipinas ang dul-an 200 ka mga Pinoy gikan sa Lebanon sugod karong semana hangtod sa Oktubre
Sumala kang Migrant Workers Secretary Hans Leo Cacdac, 11 niini nga mga Pilipino ang mupauli sa Manila sa weekend.
Ginaproseso usab karon sa gobyerno sa Pilipinas og Lebanon ang mga dokumento sa 413 ka mga Pinoy nga nag-request usab og repatriation.
Pahayag niini, 179 karon ka mga Pilipino ang anaa sa shelters sa palibot sa Beirut, wala pa kini napuno, og pwede pa maka-akomodar og dugang nga occupants.
Gipasalig usab ni Cacdac sa mupauli nga overseas Filipino workers (OFWs) nga adunay hinabang nga ihatag ang gobyerno sa mga nasampit kun makaabot na sila sa nasod.
Ginalauman nga lakip dinhi ang financial assistance nga hangtod P150,000 gikan sa DMW og sa Overseas Workers Welfare Administration (OWWA).
Gawas niini, adunay hinabang pinansyal usab nga ihatag ang Department of Social Welfare and Development (DSWD) samtang ang Department of Health (DOH) ang maghatag usab og medical assistance lakip na ang psychosocial support.
Kahibaluan nga sugod sa kagubot sa Middle East, ang Philippine embassy sa Beirut ang nakadawat na og 1,721 applications alang sa repatriation as of Oct. 8 apan sa maong numero, 511 pa lamang ang napabalik sa Pilipinas.
