Gipasakaan na og kaso sa National Bureau of Investigation-Southern Area Regional District Office o NBI-SARDO ang usa ka 19-anyos nga estudyante gikan sa Polomolok, South Cotabato, human umano kini mangayo og kuwarta sa usa ka 54-anyos nga government employee.
Sumala kang Atty. Noel Morales sa NBI-SARDO, kapin P600,000 na ang gihatag sa biktima tungod sa sunod-sunod nga pagpangayo og kuwarta ug umano’y mga hulga gikan sa suspek.
Nagkaila ang duha pinaagi sa usa ka dating website niadtong Nobyembre 2025 ug sa ulahi nagkita usab sila sa personal.
Niadtong Abril, giingon umano sa suspek nga siya mabdos ug nangayo og kuwarta alang sa mga gastusin, lakip na ang giingong gasto para sa pagpapalaglag.
Unang nagpadala ang biktima og P35,000, apan gisundan pa kini og uban pang pagpangayo hangtod nga misobra sa P600,000 ang kinatibuk-ang kantidad nga iyang gihatag.
Samtang human sa operasyon, gipasakaan na og kaso ang 19-anyos nga estudyante alang sa hustong disposisyon ubos sa balaod.
