GENERAL SANTOS CITY – Mukabat sa 17 ka mga magparyente nga taga-Brgy Fatima, ang nadala sa Dr. Jorge P. Royeca Hospital human matud pa nabiktima sa food poisoning, gumikan sa gikaon nga pancit.
Gilangkuban ang mga nahisgutan sa pipila ka hamtong, mga batan-on ug mga gagmay’ng bata, kung asa aduna pay tres anyos.
Sa pakighinabi sa Bombo Radyo kang Regina Hinalao, paryente gihapon sa mga biktima, gituuhan nilang ang giinit nga pancit ang maoy rason sa pagkahilo sa mga nasampit.
Gikabutyag nga naghikay sila alang sa lubong sa ilang apuhan kaniadtong Sabado sa hapon.
Pagkagabii, giinit matud pa nila ang nabilin nga pancit ug maoy ilang gisud-an.
Apan pagka-alas onse sa gabii, pulos sila nakasinati na sila ug pagpanakit sa tiyan, pagsuka-suka, ug pagbalik-balik sa pansayan, hinungdan nga gipang-admit na lang sa nasampit nga ospital.
Ginasuta pa karon sa mga doktor kon ang pancit gayud ang maoy nagresulta sa ingon sa nasampit nga magparyente.
