GENERAL SANTOS CITY – Ginasayod pa sa kapulisan kon kinsa ang mga namusil sa kagahapon sa buntag sa giilugang luna sa Pendatun area sa Brgy Apopong ning dakbayan.
Hustisya ang singgit sa pamilya ni Elmer Barbadillo, 43-anyos nga miyembro sa demolition team, human mapusilan-patay sa maong insidente.
Samtang lain pang upat ang samaron, kung asa duha niini mao silang Dexter Taculod ug Roberto Salas nga kauban ni Barbadillo sa demolition team, samtang angol usab ang claimant sa lugar nga si retired P/Col. Nasser Pendatun Sr.
Kahibaluan nga sa gikatakda untang ipahigayon nga demolition kagahapong adlawa, dihang wala pa ang sherrif, kapulisan ug mga miyembro sa JTF-GenSan nga mu-assist sa pagpatuman sa demolisyon, una matud pang misulod ang grupo sa Pendatun alang sa pag-demolish sa Purok 14.
Apan nagkatagbo sila sa grupo ni Flaviano Cenas nga miresulta sa pinusilay.
Matud ni P/Capt. Robert Fores, deputy chief of police sa Makar Police Station, ginasuta pa kon kinsa ang mga namusil ug mapasakaan ug kaso.
Kini tungod managsama matud pang kampo ang nagkanayon nga walay armas ug wala nagpabuto. Nasayran nga sa ilang pag-abot sa lugar, walay naabtan nga mga armas ang kapulisan sa lugar, apan may narekober nga mga bala sa carbine, 9mm ug shotgun.
