Niabot na sa 1,300 ang nangaguba nga classrooms human niigo ang Bagyong Opong sa nasud, matod sa Department of Education (DepEd).
Base sa report sa ahensya, 891 ka mga tulunghaan ang nakaangkon og ginagmay nga kadaot samtang 255 ang grabeng guba ug 254 ka classrooms ang hingpit nga naguba tungod sa epekto sa Bagyong Opong.
Sa report sa Disaster Risk and Reduction and Management Service (DRRMS), gibana-bana nga 13 milyon ka mga tinun-an ug kinatibuk-ang 569,251 ka mga magtutudlo ug empleyado sa ahensya ang naapektuhan sa miaging mga bagyo.
Kabahin niini, kapin sa 121 ka mga tunghaan ang kasamtangang gigamit nga evacuation center sa mga residente nga naapektuhan sa miaging mga bagyo.
72 niini ang natala sa Calabarzon (Cavite, Laguna, Batangas, Rizal ug Quezon), ug 35 sa Eastern Visayas (Leyte, Southern Leyte, Samar, Eastern Samar, Northern Samar ug Biliran).
Samtang, ang DepEd nipasalig sa dinaliang aksyon diin ang ahensya nakig-alayon na sa mga Local Government Units (LGU’s) alang sa mas paspas nga pagpatuman sa protocol ug pagpangandam sa pagbalik sa klase.
Gimonitor usab niini ang ubang epekto sa nangaging mga bagyo sa mga eskwelahan ug mga estudyante.
