Padayon nga nagkagrabe ang halapad nga sunog sa kalasangan nga nakaapekto sa daghang bahin sa Indonesia ug gilauman nga makapagawas pa og dakong kantidad sa carbon emissions nga hapit nang makatupong sa pinakagrabeng sunog nga natala sa nasod niining sigloha, sumala sa mga eksperto sa kalikupan.
Base sa pinakabag-ong datos gikan sa Global Fire Emissions Database, miabot na sa 76 million ka tonelada sa carbon o MtC ang gipagawas sa mga sunog sa Indonesia karong tuiga.
Tungod sa dakong pagsaka niini, ang sitwasyon karong 2026 misunod sa susamang lebel ug direksyon sa makalilisang nga sunog niadtong 2015, diin mokabat sa 2.6 million ka ektarya sa yuta ang nasunog ug nakapagawas og kinatibuk-ang 333 million ka tonelada sa carbon emissions.
Sumala sa magtiayon nga sila Farhaniza ug Ammar nga nagpuyo karon sa Indonesia, ilang gipaambit kini ang unang higayon nila nga makasinati og ingon kadako ug halapad nga sunog sa kalasangan sa lugar sa Kalimantan.
Padayon nga nagpunting ang mga awtoridad sa Indonesia sa pagpugong ug pagpalong sa nagkalapad nga mga sunog samtang nagpadayon usab ang pahimangno sa mga eksperto bahin sa posibleng epekto niini sa kahimsog sa mga residente ug sa kinatibuk-ang klima sa rehiyon.
