Miduaw si Bise Presidente Sara Duterte kang Senator Jinggoy Estrada ug Rodante Marcoleta sa New Quezon City Jail sa Payatas, Quezon City, diin silang duha karon nakakulong tungod sa magkabulag nga kaso sa plunder.
Gikumpirma usab sa Bureau of Jail Management and Penology o BJMP nga nakigkita si Duterte kang Estrada, Marcoleta ug kanhi Anakalusugan Party-list Representative Mike Defensor samtang anaa sa sulod sa detention facility.
Apan hangtod karon, wala pa magpagawas og dugang detalye ang kampo ni Duterte kabahin sa iyang pagbisita sa mga nakakulong nga opisyal.
Si Estrada kasamtangang nag-atubang og kaso sa plunder nga may kalabotan sa giingong 537-million-peso flood control scam. Nagpabilin siyang nakakulong samtang nagpadayon ang pagdungog sa iyang kaso.
Una na usab siyang miapela sa Sandiganbayan human gibasura sa korte ang iyang mosyon nga makapagpiyansa.
Samtang, si Marcoleta usab giatubang sa kaso sa plunder human miangkon nga nakadawat siya og 75-million-peso nga campaign funds atol sa iyang pagka-miyembro pa sa Kamara. Giingong wala niya kini ideklara sa iyang Statement of Contributions and Expenditures o SOCE alang sa 2025 midterm elections.
Nakakulong usab si Defensor, nga gi-aresto human giingong naghatag siya og 30-million-peso gikan sa maong campaign funds kang Marcoleta.
