Nagkalantugi sa Senado si Senador Risa Hontiveros ug Bise Presidente Sara Duterte samtang gisusi sa Office of the Vice President (OVP) ang proposed national fund alang sa sunod tuig nga nagkantidad og 2.037 billion pesos.
Atol sa pagdungog sa Committee on Finance, gisaway ni Hontiveros ang mga proyekto nga gustong pondohan sa OVP nga gihimo na sa pipila ka ahensya sa gobyerno.
Apil na niini ang medical ug burial program susama sa programa sa Department of Health (DOH) ug Assistance for Individual in Crisis Situation (AICS) sa Department of Social Welfare and Development (DSWD).
Depensa sa bise presidente nga gipulitika ang pundo, pananglitan, kon mangayo sila og AICS sa DSWD, kasagaran sila ingnon nga dili mahimo kay gikan man sa OVP nga morag kaaway.
Sa laing bahin, nangutana usab si Hontiveros bahin sa paglusad ni VP Sara sa miaging tuig, usa ka libro nga giulohan og “isang bibanga” diin nabutang ang iyang ngalan sa atubangan sa libro.
Nagkantidad og 10 milyones ka pesos ang puhunan niini nga programa hinungdan nga gipasabot sa senador ngadto sa bise presidente nga kining maong programa ipang-apod-apod ngadto sa usa ka milyon ka mga tinun-an sa mga hilit nga komunidad.
Dinhi nainitan si VP Sara ug niingon nga ang pagpangutana ni Hontiveros usa ka pananglitan sa “pagpulitika”.
Gitataw ni Hontiveros, nga yano ra ang iyang pangutana kalabot sa libro nga ipang-apod-apod sa mga bata apan nganong nagsige man og sulti ang bise presidente nga “namulitika”.
Gikompirma usab ni VP Sara ang pamahayag ni Hontiveros ug matud pa nga dili siya ganahan sa batasan sa senador dungan sa iyang pagbadlong nga ang magbabalaod maoy unang nisukol sa iyang amahan nga si kanhi Presidente Rodrigo Duterte human midaog sa eleksyon bisan pa man sa pagtabang kaniya nga mangampanya ug makabotar sa ilang lugar sa Davao City.
Morag nahimong referee si Senador Grace Poe kinsa maoy chairman sa Committee on Finance ug nakagawas sa away sa duha.
