Gimanduan sa Office of the Ombudsman si Bise Presidente Sara Duterte ug siyam ka opisyal sa DepEd ug Office of the Vice President (OVP) sa pagsumite sa ilang mga tubag sa reklamo may kalabotan sa giingong sayop nga paggamit sa confidential funds.
Ang mga respondents adunay 10 ka adlaw gikan sa petsa sa pagkadawat sa mando sa pagsumite sa usa ka counter-affidavit, ingon man sa mga pahayag sa saksi ug uban pang mga dokumento nga nagsuporta.
Ang Ombudsman nipasidaan nga ang kapakyas sa pagsumite sulod sa gitakdang panahon makonsiderar nga waiver sa katungod sa pagpresentar og ebidensya, ug magpadayon ang preliminary investigation.
Ang bisan unsang motion to dismiss o motion for bill of particulars dili usab dawaton.
Ang mga reklamo nga gisang-at sa Kamara batok kang Duterte ug uban pa naglakip sa plunder, technical malversation, falsification, bribery, perjury, ug violation of the Constitution. Ang kaso may kalambigitan sa giingong sayop nga paggamit sa ₱500M confidential funds sa OVP ug ₱112.5M sa DepEd gikan sa 2022–2024.
Lakip usab sa giimbestigahan sa DepEd sila si Edward Fajardo, Gina Acosta, Atty. Sunshine Charry Fajardo, Maj. Gen. Nolasco Mempin (ret.), ug Undersecretary Annalyn Sevilla.
Gikan sa OVP, lakip si Atty. Zuleika Lopez, Lemuel Ortonio, Lt. Col. Dennis Nolasco, ug Col. Raymund Dante Lachica.
Gihimakak ni Duterte ang mga pasangil, nga kabahin usab sa impeachment case nga gisumite sa Senado.
