Gihagit ni House prosecutor team spokesperson ug Lanao del Sur Rep. Zia Alonto Adiong si Bise Presidente Sara Duterte nga dad-on sa impeachment court ang mga nakadawat sa iyang confidential funds sama nila ni Mary Grace Piattos ug Kokoy Villamin.
Sumala sa magbabalaod, turno na ni Duterte ang pagpamatuod nga ang sertipikasyon sa Philippine Statistics Authority (PSA) nga sila si Mary Grace Piattos ug Kokoy Villamin dili tinuod nga mga tawo sayop tungod kay wala silay birth, marriage ug death records.
Miingon usab siya nga kinahanglan nga suklan ni Duterte ang report sa Questioned Documents Division sa National Bureau of Investigation (NBI) nga ang mga pirma sa acknowledgement receipts sa giingong nakadawat sa confidential funds nga gisumite sa Commission on Audit (COA) gihimo sa usa ka tawo.
Sa sinugdanan, ang kampo ni Duterte miingon nga mga alyas lang ang nakadawat sa iyang confidential funds apan sumala ni Adiong, kinahanglan pa nga ibutyag sa bise presidente kung kinsa ang migamit o adunay mga ngalan nga gigamit nila ni Mary Grace Piattos ug Kokoy Villamin.
Niinsistir si Adiong nga kon dili buhian sa kampo ni Duterte ang mga nakadawat sa iyang confidential funds nga mobalor og P612.5 milyon, mas molig-on pa ang report sa PSA ug NBI nga ang mga nakadawat sa spy funds dili tinuod nga mga tawo.
