CEBU CITY- Narecover ang usa ka vintage bomb sa mga personahe sa Waterfront Police Station 3 human kini mapalgan sa compound sa Commission on Audit (COA) Region 7 nga nahimutang sa Barangay Tinago, dakbayan sa Sugbo, Martes, Hulyo 8, 2025.
Sa pakighinabi sa Bombo Newsteam kang Police Lieutenant Colonel Maria Theresa Macatangay, ang tigpamaba sa Cebu City Police Office (CCPO), gitino niini nga ang mga personahe sa COA-7 nangayo og tabang sa duha ka pulis nga nag-beat patrol sa dapit, nga sila Police Patrolman Joseph Canarejo ug Police Patrolman Mark Jason Delima human makit-i sa usa ka backhoe operator ang usa ka dakong vintage bomb samtang nagtrabaho sa usa ka construction site sa maong compound.
Sa pagkumpirma sa kahimtang, dayong nanawag ang duha ka pulis sa mga sakop sa Regional Explosive and Canine Unit (RECU) 7, nga gipangulohan ni Police Lieutenant Joel Taboada.
Malampuson nilang narekober ang maong bomba nga gibanabana nga 1,000 ka libras ug naila nga usa ka General Purpose vintage bomb.
Gideklarar usab sa mga otoridad nga luwas na ang dapit human makuha ang maong eksplosibo.
Matud ni PLtCol. Macatangay, ang maong insidente nagpakita sa pagka-alerto ug pagka-propesyonal sa atong mga kapulisan sa Cebu City.
Gipahimangnoan usab sa CCPO ang publiko, ilabina kadtong nagtrabaho sa mga construction site, nga kung makakita og susamang butang, dili kini hilabtan ug dayong ipahibalo sa otoridad.
Ang maong insidente karon padayon pa nga giimbestigahan aron masuta kung giunsa pag-abot sa bomba sa maong dapit ug kung adunay historical background nga nagtugot sa presensya niini sa compound.|With reports of Bombo Jairah Camello
