Nag atubang si Pasig City Mayor Vico Sotto ug laing tulo ka mga opisyal sa siyudad og graft complaints sa kalapasan sa Government Procurement Reform Act tungod sa giingong wala maapod-apod nga cash allowance sa mga empleyado sa Pasig City Hall.
Sa 28 ka panid nga reklamo nga gisang-at sa Office of the Ombudsman niadtong Hulyo 30, 2024, gi akusahan ni Michelle Prudencio silang Sotto, Human Resources Development Office head Elvira Flores, City Administrator Jeronimo Manzanero, ug Bids and Awards Committee head Josephine nga wala gipang apud apud ang P1,500 nga allowance sa mga empleyado sa Pasig City Hall alang sa ika-451 nga “Pasig Day” kaniadtong Hulyo 2, 2024.
Dugang pa sa reklamo nga imbes cash allowance, gihatagan ang mga empleyado og commemorative t-shirts nga giingong nakuha nga walay saktong procurement process.
Si Sotto unang niluwat og Executive Order (EO) No. 28 nga pinetsahan og Hunyo 27 kung asa giingong gi-issue ang allowance sa pagkuha/pagpalit sa commemorative shirts alang sa 2024 Araw ng Pasig celebration.
Gipahayag usab sa EO nga ang mga empleyado sa Pasig City Hall gipahibalo sa pag-release ug schedule sa distribution sa mga t-shirt niadtong Hunyo 28 ug 29.
Apan, sa unang gitakda nga pag-apod-apod sa mga t-shirt, walay cash allowance nga gihatag.
Laing mga reklamo ang gipasaka batok kang Sotto ug laing duha ka opisyal sa dakbayan tungod sa giingong ilegal nga paghatag og diskwento sa usa ka telecommunications provider.
Matod ni Sotto nga ang pagpasaka og mga reklamo batok niya kabahin sa hugaw nga taktika sa pipila ka politikanhong grupo.
