GENERAL SANTOS CITY – Utang ang usa sa gitutukan karong motibo sa kapulisan may kalabutan sa pagpatay sa magtiayong negosyante sa Palkan, Polomolok, kaniadtong Disyembre 28.
Matud kang Police Chief Inspector Giovanni Ladeo, hepe sa Polomolok Municipal Police Station, may giutang nga salapi ang kamagwangang anak sa magtiayon nga biktima nga silang Raul ug Ofelia Alitaw, taga Koronadal Proper, Polomolok, South Cotabato.
Gikabutyag nga gihimong kolateral sa utang sa ilang anak ang motorsiklo niini.
Apan dihang pakyas nga makabayad, gikuha matud pa sa iyang nautangan ang motorsiklo, hinungdan nga nakaabotn sila sa barangay ug nabawi kini, dungan sa ilang sabot nga bayaran ang utang pagka-Enero 2.
Apan pipila ka adlaw una ang maong petsa, gipangpusil-patay na ang magtiayon.
Sa karon mas gipalawman pa sa kapulisan ang imbestigasyon kalabot sa maong insidente, dungan sa pagpangalap ug dugang impormasyon aron matumbok ang tinuod nga suspek aron makasuhan na ug mapanubag sa gihimong krimen.
