Gilauman nga mosaka pa ang kinatibuk-ang utang sa Pilipinas ngadto sa P21.48 trilyon pag-abot sa kataposan sa 2027, base sa mga dokumento sa Budget and Expenditures and Sources of Financing.
Mas taas kini kumpara sa projected debt level nga P19.76 trilyon alang sa 2026.
Samtang, miabot na sa P19.065 trilyon ang utang sa national government sa kataposan sa Hunyo 2026.
Mas taas kini og P518.98 bilyon kumpara sa P18.546 trilyon niadtong Mayo ug P17.267 trilyon niadtong Hunyo 2025.
Tungod niini, uban sa hinay nga economic growth nga 2.3% sa unang katunga sa 2026, misaka sa 66% sa gross domestic product o GDP sa nasod ang debt-to-GDP ratio.
Kini na ang pinakataas nga lebel sulod sa 22 ka tuig, sukad nga miabot kini sa 71.6% niadtong 2004.
Sa giproject nga P21.48 trilyon nga utang sa 2027, mokabat sa P14.3 trilyon ang maggikan sa domestic borrowing, samtang P7.2 trilyon naman ang external debt.
Nakabase ang projection sa pangagpas nga ang exchange rate sa piso mahimong P62 kada US dollar pag-abot sa kataposan sa 2027.
Samtang, gilauman nga moabot sa P3.304 trilyon ang gross borrowings sa national government sa sunod tuig.
Sa maong kantidad, P2.389 trilyon ang gilauman nga maggikan sa domestic sources, samtang P914.982 bilyon naman ang gikan sa foreign sources.
Lakip sa planong domestic borrowing ang P2.329 trilyon gikan sa fixed-rate Treasury bonds ug P60 bilyon gikan sa Treasury bills.
