GENERAL SANTOS CITY- Padayong giimbestigahan sa kapulisan ang labing ulahing natigayong duha ka pagpamusil dinhi sa dakbayan kagahapong adlawa.
Kahibaluan nga ang usa natigayon sa usa ka haya sa Siniguelas St sa Habitat Phase B Brgy Mabuhay ning siyudad, kung asa ang biktima giilang si Edgar Marquez.
Sa imbestigasyon, mipatunga lamang siya sa higala nga may nakalalis, kung asa nasuko ang wala mailhing responsable ug gipusil ang biktima sa ulo nga maoy hinungdan sa iyang hinanaling kamatayon.
Samtang ang laing biktima sa pagpamusil mao ang traysikel driver nga nagtorno sa Purok. 5 Santo Niño, Brgy Apopong ning dakbayan, kagahapon sa buntag.
Giila ang biktima nga si Roy Salaga, hamtong ang pangidaron nga taga Prk 4, sa maong lugar.
Gibutyag nga samtang gatorno ang namatay giduolan sa responsable ang biktima ug gipusil igo sa ulo.
Gidala pa sa ospital ang biktima apan gideklara sa doktor nga dead on arrival.
Gibutyag nga ang namatay ang nagsurface kaniadto sa mga otoridad tungod gagamitan ug ilegal nga droga.
Samtang, pasado alas 11:00 kagabie, gipusil ang nagpangalan og Danilo Pahamutan, 26 anyos, nga residente sa Phase 2 GenSanville Subd. Brgy Bula.
Gipusil ang biktima sa nakamotorsiklo upat ka higayon samtang kauban ang anak nga nagbaktas pauli na sa ilang balay.
Naigo ang biktima sa ulo, likod ug dughan nga hinungdan sa hinanaling kamatayon.
Ang tulo ka natigayong pagpamusil ang padayon pang giimbestigahan sa kapulisan.
