Dili moubos sa tulo ka tawo ang gikatahong namatay sa Davao Region ug SOCCSKSARGEN tungod sa epekto sa Bagyong Kiyapo ug sa Habagat.
Apan, sumala sa National Disaster Risk Reduction and Management Council, padayon pa nga giberipika ang maong mga report.
Samtang, usa ka tawo usab ang gikatahong nawala sa SOCCSKSARGEN.
Mikabat na sa kapin 193,000 ka indibidwal o labaw sa 41,000 ka pamilya gikan sa 258 ka barangay sa pito ka rehiyon ang naapektuhan sa kusog nga ulan ug pagbaha nga gipahinabo sa dili maayong panahon.
Sa maong ihap, kapin 9,000 ka tawo ang karon nagpabilin sa mga evacuation center aron masiguro ang ilang kaluwasan.
Natala usab ang pagkadaot sa 235 ka balay sa Western Visayas, Zamboanga Peninsula, SOCCSKSARGEN, ug BARMM. Niini, 158 ang adunay partial damage samtang 77 ang hingpit nga naguba.
Bisan pa nga nakagawas na sa Philippine Area of Responsibility ang Bagyong Kiyapo, padayon gihapon kining gibantayan sa mga awtoridad tungod kay posible gihapon nga mopakusog kini sa Habagat nga maoy nagdala sa padayon nga kusog nga pag-ulan sa pipila ka bahin sa nasod.
