Gimando karon sa Manila Regional Trial Court Branch 51 nga mabalhin sa kustodiya si kanhi Negros Oriental Representative Arnolfo ‘Arnie’ Teves Jr. gikan sa detention facility sa National Bureau of Investigation.
Sa usa ka resolusyon nga gipagawas sa korte, gi-isyu niini ang usa ka ‘commitment order’ nga ibalhin si Teves paingon sa BJMP compound, Camp Bagong Diwa sa Taguig City.
Sa wala pa kini, gibasura sa Manila RTC ang mosyon sa kampo ni Teves nga magpabilin kini sa kustodiya sa NBI.
Samtang, gibasahan si Teves sa unod sa iyang kaso kalabotan sa pagpatay kay Gov. Roel Degamo niadtong 2023 pinaagi sa video conference sa Manila RTC Branch 51.
Mibalibad si Teves nga magsang-at og plea hinungdan awtomatikong nagsang-at ang korte og not guilty plea para kaniya sa 10 ka ihap sa murder, 13 ka ihap sa frustrated murder, og 4 ka ihap sa attempted murder.
Para sa pamilya Degamo, ang natigayon nga arraignment gikonsidera nilang importanteng lakang sa pagkab-ot sa hustisya.
Gitakda sa korte ang pre-trial sa mga kaso sa Agosto 20.
