GENSAN – Gibutyag ni Police Lieutenant Colonel Patrich Elma, hepe sa Traffic Enforcement Unit-Gensan, nga dili ‘selective’ ang ilang buhatan sa pagpahigayon og checkpoint ug inspeksyon sa mga sakyanan sa kadalanan.
Matud niya, dili lang mga motorsiklo ang ginapara sa checkpoint kundili apil usab ang mga four-wheeled vehicles sama sa sakyanan, van ug trak.
Ang tanang checkpoint operations sa dakbayan ginapatuman subay sa Standard Operating Procedure o SOP sa Philippine National Police.
Aduna silay ginasunod nga ‘pattern’ ug klarong lokasyon sa pagpahimutang sa checkpoint nga gituyo isip crime preventive measure aron mapugngan ang paglapas sa balaod ug masiguro ang kaluwasan sa katawhan.
Gipasabot usab ni Elma nga kada adlaw adunay deployment plan ang ilang buhatan aron masiguro nga hapsay ug organisado ang pagpatuman sa checkpoint operations sa nagkalain-laing bahin sa dakbayan.
