GENERAL SANTOS CITY – Patay ang usa ka indibidwal human ang gipahigayon nga buy-bust operation sa Regional Police Drug Enforcement Unit (RPDEU) sa Police Regional Office 12 sa Brgy. Bula ning dakbayan.
Giila ang nahisgutan nga si Marjoy Macahidhid alyas Dodong 29 anyos nga residente sa Alvarez Compound Rajah Muda Brgy. Bula.
Nasuta sa imbestigasyon nga kini ang gikanta sa naospital nga suspek sa tulis nga si Denmark Espin.
Nasayran nga ang maong suspek ang nalambigit usab sa pagpangholdap.
Gikabutyag nga misukol sa kapulisan ang suspek hinungdan nga napusilan sa nagkadaiyang bahin sa lawas ug nawong kon diin gideklarang dead on arrival sa tambalanan.
Nakuha sa suspek ang armas nga Ozi ug pito ka buhing abla, lakip ang sachet sa shabu ug buy bust money, duha ka cellphone ug relo.
Gipanghimakak usab sa igsuon nga nalambigit sa robbery holdap ug NPA surrenderee ang iyang suspek.
