GENSAN– Pasakaan na og kaso ang lima ka mga lalaki nga nadakpan atol sa checkpoint operation sa Panatan Border, Pigcawayan, Cotabato sa miaging adlaw human masakmit ang smuggled nga sigarilyo nga nagkantidad og kapin P15.7 milyon.
Matod ni Police Regional Office 12 (PRO-12) Regional Director PBGen. Arnold P. Ardiente, ang mga suspek nga taga-Zamboanga Sibugay ug Ozamiz City nadakpan sakay sa duha ka wing van trucks nga adunay karga nga 400 ka kahon o gibanabana nga 20,000 ka ream sa Fort ug Berlin brand nga sigarilyo.
Gibanabana nga P15,716,000 ang market value sa nakumpiska nga kontrabando base sa Bureau of Customs (BOC). Apan labaw pa niini, gisiguro ni Ardiente nga gukdon ang mga supplier, sindikato o kun taga gobyerno nga responsable sa maong kontrabando.
Ang mga nadakpan gikatakdang pasakaan og kasong kalapasan sa Republic Act 10863 o Customs Modernization and Tariff Act ug Republic Act 10643 o Graphic Health Warning Law.
Gawas pa niini, posibleng mosangpot kini og dugang nga kaso kon mapamatud-an nga kabahin sila sa mas lapad nga sindikato sa smuggling.
Sa pagkakaron, anaa sa kustodiya sa PRO-12 Camp Tambler, General Santos City ang mga suspek samtang giandam ang pormal nga pagsaka sa kaso batok kanila.
