GENERAL SANTOS CITY – Posibleng gibasehan ni Sen. Riza Hontiveros ang kultura nga naghatag ug dakong respeto sa mga kababainhan dinhi sa nasud, sa giduso niini nga balaodnun nga silutan ang mga ireklamong nanaghoy sa mga babaye, gumikan usa ka matang sa harassment.
Kini ang panglantaw ni Judge Chalmer Gevieso sa Sarangani, kung asa posibleng may puruhan matud pa ang maong sugyot, hilabi na kon mapamatud-an nga nabastos gayud ang usa ka babaye nga gitaghuyan.
Kahibaluan nga base sa sugyot, ang kinsa man ang madakpan nga milapas ang mahimong masilutan ug usa hangtod unom ka bulan ug magmulta ug P10,000.
Matud ni Judge Gevieso, depende na lamang didto sa Kongreso ug Senado kon ipasa ang maong sugyot balaodnun. Gatuo usab kini nga mamahimong patas ang balaod kon ugaling mapasa kini, ug i-classify ug i-qualify kon unsang matang sa pagpanipol ang makonsiderang pagpamastos sa mga kababainhan.
Ingon usab alang kang Atty Teodoro Sales, inilang abugado sa siyudad, kung asa angayang sutaon matud pa kon unsa ang intensyon sa gihimong pagpanitsit sa usa ka lalaki ngadto sa usa ka babaye.
Sumala pa nga adunay uban nga ang tumong isip lamang pagdayeg sa kaanyag sa usa ka babaye, samtang aduna usay uban nga pagpamastos na.
Hinungdan nga angayan matud pang sutaon sa mga magbabalaod, ug lauman nga taas pa ang mamahimong debate alang sa nasampit nga balaodnun.
