Nagpagawas og bag-ong pahimangno ang environmental group nga Ban Toxics sa publiko batok sa mga delikadong kemikal ug posibleng peligro nga dala sa pipila ka dekorasyon ug Christmas lights karong misulod na ang “Ber” months ug misugod na og dagsa ang mga palamuti sa merkado.
Sa pakighinabi sa Star FM Cebu kang Thony Dizon, Advocacy and Campaign Officer sa Ban Toxics, iyang gipadayag ang importansya sa pagsusi sa label ug kompleto nga product information aron masiguro kung luwas ba ang mga materyales nga gigamit ug kung nagsunod ba ang produkto sa nasudnong safety standards.
Partikular nga gipahimangnoan ni Dizon ang mga konsumante batok sa pagpalit og substandard nga Christmas lights tungod kay mahimo kining mag-overheat ug posibleng hinungdan sa sunog sa mga panimalay.
Gipahinumdoman usab sa opisyal ang publiko nga dili lamang ang barato nga presyo o nindot nga disenyo ang angay nga basihan sa pagpili og produkto.
Kinahanglan usab nga susihon kung adunay Import Commodity Clearance o ICC sticker, o kaha ang tukmang product standard markings.
Giawhag sa grupo ang publiko nga likayan ang mga produktong dili klaro ang gigikanan o adunay mga materyales nga mahimong makadaot sa kahimsog sa pamilya ug sa kinaiyahan.
Matud pa ni Dizon, bisan pa og sa gagmay o barato nga tindahan mopalit ang mga konsumante tungod sa limitado nga budget, mahimo gihapon silang mamili og mas luwas nga produkto pinaagi sa maampingong pagsusi sa label, kondisyon sa produkto ug safety markings sa dili pa kini bayran.
