General Santos City | Angayang mahipos og tarong ang namatay nga sperm whale nga napadpad sa baybayon sa Sugal, Jose Abad Santos Davao Occidental.
Matud ni Allan Marcilla, labaw sa City Environment and Natural Resources Office sa dakbayan nga dili angayang pasagdan ang balyena nga madugta lang sa dagat tungod magresulta kini og ‘organic pollution’ sama sa dili maayong baho sa palibot.
Gibutyag ni Marcilla, angayang himuon sa sperm whale mao ang paglubong sa yuta. Sa pamahayag niini, magpahigayon og necropsy sa balyena aron masayran ang hinungdan sa pagkamatay. Kahibaluan nga saysenta ka pye ang gitas-on ug siyam ka pye ang gilapdon sa maong balyena.
Sa pamahayag ni Marcilla, usa ka migratory nga matang sa mammal ang balyena tungod nagapangita og pagkaon. Gidugang usab niini nga endangered specie ang sperm whale nga gitawag usab nga “gentle giants’ sa kadagatan tungod dili mangaon kon muatake og tawo.
Sama sa ubang mga mananap, adunay papel ang balyena sa pag-angkon ug nindot nga balanse sa ecosystem tungod sila ang mag-fertilize sa kadagatan.
