GENERAL SANTOS CITY – Wala gikalimtan sa mga Konsehal ning syudad ang usa ka kontrobersiya kalabutan sa pagpahid ug dugo sa tinda nga isda sa merkado aron tan-awon nga presko ang ilang paninda.
Human mipasa sa unang pagbasa sa Sanggunian Panlungsod takda nga isalang sa ikaduha nga pagbasa ang proposed ordinance nga magbawal sa mga indibidwal ug mga nagnegosyo sa syudad ang pagpahid ug dugo sa baboy ug uban pang dugo aron lantawon nga presko ang ilang baligya.
Matud ni Councilor Jose Orlando Acharon nga sa labing ulahi nga regular session nagduso ug mga kabag-uhan sa ordinansa nga iapil ang tanan nga marine products nga ginabaligya sa merkado sa syudad.
Apil sa proposed measure ang pagpatuman ug multa ug silot sa mga madakpan nga musupak sa ordinance.
Kahinumduman nga sa miaging tuig nadeskubre sa mga market inspectors nga ang kasagaran sa baligya nga hiniwa nga tuna sa Central Public Market ang gipahiran ug dugo sa baboy aron tan-awon nga presko.
Ang maong kontrobersiya ang gireklamo sa mga wala gakonsumo ug karne sa baboy hinungdan nga gisuspenso sa syudad ang upat ka mga stalls ug gimultahan ang mga tag-iya niini.
