Nagdesisyon ang mga sakop sa House Committee on Good Government and Public Accountability nga motampo ug kwarta aron mahatagan og reward si bisan kinsa nga makatudlo kang “Mary Grace Piattos” nga adunay dakong kantidad sa confidential funds sa Office of the Vice President.
Si Zambales Representative Jay Khonghun nikompirmar nga motanyag sila og usa ka milyon ka pesos sa bisan kinsa nga makahatag og impormasyon kon kinsa ug asa si Piattos.
Giingon ni Khonghun nga bisan kung adunay ubang mga ngalan nga kwestyonable sa mga resibo sa pag-ila, ang “Mary Grace Piattos” ingon adunay labing kadaghan nga nakuha.
Ang ngalan ni Piattos milutaw sa Good Government and Public Accountability hearing diin giingong usa siya sa mga mipirma sa acknowledgement receipts nga gisumite sa OVP ngadto sa COA kalabot sa confidential funds.
Matod ni La Union Representative Paolo Ortega, ang mga ngalan nga gigamit sa OVP mahimong itandi sa listahan sa sari-sari store.
Nasubo usab sila si Khonghun ug Ortega nga dili motambong si Bise Presidente Sara Duterte sa sunod nga hearing sa House panel bisan pa nga personal nga gipaabot kaniya ang imbitasyon.
Gani, gusto nila nga mahuman na ang imbestigasyon sa komitiba ug maaprobahan ang committee report, mao nga importante nga aduna silay mga resource person nga makapasabot sa giingong sayop nga paggamit sa pundo.
