Tulo ka bulan human ipatuman sa Australia ang pagdili sa paggamit sa social media alang sa mga wala pay 16 anyos, migawas sa usa ka pagtuon nga daghang kabatan-onan ang padayon gihapon nga naka-access sa mga online platform.
Sumala sa eSafety, ang internet safety regulator sa Australia, wala pa mahimong epektibo ang age verification system sa mga social media platform, hinungdan nga daghang menor de edad ang makahimo gihapon og account o makagamit sa maong mga serbisyo.
Gipakita sa pagtuon nga halos wala mausab ang kadaghanon sa paggamit sa social media sa mga kabataan nga nag-edad 10 hangtod 15 bisan human sa pagpatuman sa maong balaod.
Bisan mikunhod ang gidaghanon sa mga kabataan nga adunay kaugalingong social media account, nagpabilin nga kapin 80 porsyento ang nagagamit gihapon sa mga platform sama sa YouTube, TikTok, Snapchat, Facebook, ug Instagram.
Tungod niini, nagpadayon ang imbestigasyon sa gobyerno sa Australia batok sa pipila ka dagkong tech companies tungod sa posibleng pagkapakyas sa pagsunod sa bag-ong balaod.
Kahibaluan nga ang Australia mao ang unang nasud nga nagpatuman og nationwide ban sa social media alang sa mga wala pay 16 anyos isip lakang aron mapanalipdan ang kahimsog ug kaayohan sa mga kabatan-onan.
