GENSAN- Gipadayag ni Police Brigadier General Arnold Ardiente, Regional Director sa Police Regional Office 12 nga sa pagkakaron dili pa alarming ang mga insidente sa pagpamusil o shooting incidents sa Rehiyon 12 bisan pa adunay pipila ka nahitabong kaso sa nagkadaiyang lugar.
Giklaro niya nga kini nga mga insidente mao ang mga kaso sa pagpamusil nga naglambigit og armas, apan mikunhod na kon itandi sa miaging mga bulan diin sunod-sunod gyud ang maong mga hitabo.
Tungod niini, gipakusgan sa kapulisan ang ilang kampanya batok sa loose firearms aron mapugngan ang dugang pang pagpamusil.
Padayon usab ang koordinasyon sa tanang police stations aron masiguro nga matubag dayon ang bisan unsang shooting incident nga motumaw.
Matud pa ni Ardiente, padayon nilang pahimangnoan ang mga Chiefs of Police pinaagi sa regular nga pakigpulong ug hugot nga pag-monitor sa sitwasyon.
Gilauman sa kapulisan nga pinaagi niini nga mga lakang, mas mapugngan pa ang mga insidente sa pagpamusil ug mapadayon ang kalinaw sa rehiyon.
