GENERAL SANTOS CITY – Hugot karong gitutukan sa GenSan City Police Office ang serye sa mga shooting incident sa dakbayan sa Gensan aron mahatagan og hustisya ang mga biktima.
Matud kang PCol. Jomar Alexis Yap, Acting City PNP Director sa GSCPO, ang ilang ginalihok sa karon nga masayran kung grupo o indibidwal lang ang responsable sa mga pagpamusil.
Gipaabot ni Col. Yap ang iyang pahisubo sa mga kabanay sa mga biktima.
Nasayran nga nadamay ang usa kasais anyos nga batang babaye sa natigayon nga pagpamusil sa Fil-Am Road Barangay Fatima, General Santos City.
Giila ang biktima nga si alyas Precious nga naigo sa bala human nga gipuntirya ug pusil sa motorcycle riding criminal ang biktima nga si Dante A. Macasalong, nga anaa sa hamtong ang pangidaron nga residente sa Olarte Village Barangay Labangal ning syudad samtang nagmaneho sa tricycle.
Sa nahitabong pagpamusil, samdan usab ang duha pa ka laing pasahero.
Samtang kaganihang buntag lang, gikataho na usab ang laing insedente sa pagpamusil sa Purok San Vicente, Barangay San Isidro, ning syudad human misulod matud pa ang mga informal settlers sa 12 ka ektarya nga yuta sa pamilyang Alaiden.
Padayon pang giberepika ang report nga may namatay o nasamdan sa maong insidente.
Sa miaging adlaw, gipusil patay usab ang usa ka nagpangalang Jerry Alquizar, 55 anyos nga taga Purok Alquizar Barangay Apopong ning dakbayan.
