GENERAL SANTOS CITY -Mukabat sa 65,000 ang mga enrollees sa senior high school ning tuiga sa Rehiyon 12.
Matud pa ni Deped 12 Regional Director Arturo Bayocot, kini sobra og 5,000 sa target sa ilang buhatan ning tuiga nga mukabat sa 60,000 ka mga magtutungha.
Gibutyag sa maong opisyal nga bisag daghan ang mga estudyante apan walay angayang kabalak-an sa mga classrooms tungod paigo ang mga gipangtukod.
Ug ang uban nga school buildings ang nagpadayon ang construction nga gilaumang mahuman ning tuiga.
Aron maakomodar ang tanang enrolees nga senior high school, nagpahigayon og double shifting sa mga magtutungha, kon adunay buntag lang ang klase og adunay hapon lang musulod.
Hinuon, ibalik sa single-shift ang klase sa mga apektadong klase kon andam nang magamit ang mga bag-ong school buildings nga mahuman sa Disyembre.
Si Regional Director Bayocot ang usa sa bisita sa Gensan edukasyon Fair 2017 nga nahuman kagahapong adlawa.Ang mga partisipante sa maong aktibidad mao ang mga senior high school sa tibuok syudad.
