GENSAN- Personal nga mibisita sila Sen. Robin Padilla ug Sen. Camille Villar sa Purok Balite ug Carcon Village sa Barangay Lagao aron makita ang kahimtang sa mga residente nga naapektuhan sa magnitude 7.8 nga linog.
Atol sa ilang pagbisita, naghatag sila og bugas ug mga gallon sa limpyo nga tubig alang sa mga apektadong pamilya ug gipaminawan usab ila ang mga problema ug panginahanglanon sa mga residente.
Sumala ni Mayor Lorelie Geronimo Pacquiao, dako kaayong butang ang ilang pag-abot tungod kay nagpakita kini nga wala nila biyai ang mga lumulupyo sa panahon sa kalisdanan.
Gipasalamatan sa mayor ang duha ka senador tungod sa ilang paspas nga pagresponde ug tinuoray nga malasakit sa mga biktima sa kalamidad.
Matod pa niya, ang ilang presensya ug suporta naghatag og paglaum ug kusog sa mga residente nga padayon nga naningkamot sa pagbangon.
Giawhag usab ni Mayor Pacquiao ang pagpalig-on sa panaghiusa ug bayanihan aron mas dali nga makabangon ug mahimong mas lig-on pa ang General Santos City human sa maong trahedya.
