Nagpabilin si Senador Rodante Marcoleta sa Quezon City Jail-Male Dormitory human siya gidakop tungod sa plunder nga walay piyansa may kalabotan sa giingong pagdawat og P75 milyon nga mga donasyon sa kampanya.
Nauna nang gimando sa Sandiganbayan ang pagbalhin ni Marcoleta human ang usa ka independente nga medikal nga eksaminasyon sa University of the Philippines-Philippine General Hospital nagbutyag nga wala na siyay pneumonia ug walay nakitang impeksyon sa iyang baga.
Mahinumduman nga ang kampo ni Marcoleta mihangyo nga magpabilin siya sa PNP-hospital tungod sa kondisyon nga iyang nasinati nga posibleng may kalabutan sa pneumonia ug uban pang mga sakit nga giantos sa magbabalaod.
Ang mga kauban ni Marcoleta nga akusado mao ang kanhi magbabalaod nga si Mike Defensor, mga negosyante nga si Joseph Espiritu, ug si Aristotle Viray, kinsa miangkon nga dili sad-an. Wala gi-arraign si Marcoleta tungod kay ang iyang mosyon nga ibasura ang iyang kaso nagpadayon pa.
Gawas sa kasong plunder, ang mga akusado nag-atubang usab og mga kaso sa paglapas sa Presidential Decree 46, nga nagdili sa mga opisyal sa gobyerno sa pagdawat og mga regalo o bisan unsang benepisyo tungod sa ilang posisyon.
Nakakita usab ang Sandiganbayan og probable cause niining kaso batok kang Marcoleta ug Defensor.
Gitakda sa korte ang arraignment alang kang Espiritu ug Marcoleta sa Hulyo 22.
