Andam si Senator Lito Lapid nga muluwat sa puwesto isip senador ugaling mapamatud-an nga aduna kini kalabotan sa gi-raid nga POGO sa Porac, Pampanga nga Lucky South 99.
Sa pagdungog sa Senate Committee on Women, Children, Family Relations and Gender Equality, gibutyag ni Lapid nga adunay usa ka vlogger nga wala gipanganlan nga ginapugos nga aduna y siyay kalambigitan sa POGO sa Porac.
Sa pamahayag ni Lapid, giakusahan siya sa vlogger nga siya ang tag-iya sa yuta nga gitindugan sa POGO ug ang alegasyon nga protector siya sa POGO sa lugar.
Hagit ni Lapid nga ugaling mapamatud-an nga apil ug may kalabotan siya sa POGO sa Porac, mukanaug siya sa puwesto isip senador.
Gihingusgan sa magbabalaud nga dili tugotan ang kinsa man nga gubaon ang iyang pangalan tungod lamang niini ilabina daghang tuig na kini nagserbisyo sa lokal nga panggamhanan ug sa Senado.
Dismayado ang senador nga tungod sa iligal nga operasyon sa POGO dili na maayo ang imahen sa ilang probinsya ug naapektuhan na usab ang sektor sa ilang pamuhunan.
