Nanawagan pag-usab si Senate Blue Ribbon Committee Chairman Erwin Tulfo alang sa paspas nga pagpasa sa sugyot nga Masterplan for Infrastructure and National Development o MIND Act, nga nagtumong sa paghimo og komprehensibong plano alang sa mga imprastraktura sa tibuok nasud.
Nagpabilin pang pending sa Senate Committee on Economic Affairs ang maong sugyot, nga gipadayag pag-usab ni Tulfo atol sa pagsugod sa diskusyon sa gisugyot nga 2027 national budget.
Matod ni Tulfo, kinahanglan nga maangot sa usa ka dugayng panahon nga plano ang mga proyekto nga ginahimo ug gisugyot aron malikayan ang mga proyektong napasagdan, wala mahuman ug substandard nga mga imprastraktura.
Gipasabot sa senador nga gipakita sa sunod-sunod nga pag-ulan ug pagbaha ang kahimtang sa mga nadaot nga tulay ug kalsada, lakip na ang mga proyektong wala nadayon bisan napondohan na ang unang hugna niini.
Dugang pa niya nga mausik lamang ang pondo sa katawhan sa mga proyektong dili mapuslan sa publiko tungod sa kakulang sa hustong pagplano.
Giinsistir usab ni Tulfo nga kinahanglan mailhan ug mahuman ang mga pending nga proyekto, samtang ang mga bag-ong sugyot kinahanglang mohaom sa mga plano hangtod sa lokal nga lebel.
Matod pa niya, kinahanglan nga lig-on, malungtaron ug makasugakod sa grabeng kahimtang sa panahon ang mga pampublikong imprastraktura, bisan kinsa pa ang administrasyong naglingkod.
Una nang gipahayag ni Tulfo nga siya mismo ang manguna sa pormal nga imbestigasyon sa Senado bahin sa mga giingong substandard nga proyekto nga nakita tungod sa mga niaging pag-ulan ug pagbaha.
