Gitugyan na matod pa ni Sen. Erwin Tulfo sa Office of the Ombudsman ang pagsusi sa hingpit nga pagbawi ni Orly Guteza sa iyang unang gipanumpaang pamahayag.
Matud pa, gihimo ni Guteza ang iyang recantation niadtong Agosto 19, pipila ka bulan human siya unang mitunga sa Senate flood control investigation ug mipasangil sa pipila ka indibidwal nga nakadawat og mga maleta nga adunay kuwarta isip kickback sa mga proyekto sa flood control.
Si Sen. Tulfo mao ang bag-ong chairperson sa makagagahom nga Senate Blue Ribbon Committee nga nagpahigayon og lawom nga imbestigasyon kalabot sa maong eskandalo.
Sa interbyu kang Tulfo, iyang giingon nga mas maayong itugyan na lamang sa Ombudsman ang imbestigasyon ug ang pagpanubag sa mga nalambigit.
Matud sa senador, parehas ang tumong sa Ombudsman ug sa Senate panel—ang mapanubag ang bisan kinsa nga nalambigit sa maong eskandalo. Busa, para kaniya, mas dali ang proseso sa accountability kung ang Ombudsman na mismo ang mosusi sa tanang aspeto nga naglibot sa maong isyu.
Gihisgutan usab ni Tulfo ang pipila ka dagkong personalidad nga napriso na sa Ombudsman sa miaging mga bulan, nga iyang gihimong pananglitan sa paspas nga proseso niini.
Sumala kang Sen. Tulfo, kung ipadayon pa kini sa Senate panel, posibleng molungtad pa og pipila ka bulan ang mga hearing. Asikasuhon na usab sa Senado ang 2027 National Budget, nga timailhan sa pagsugod sa budget season sa Kongreso.
Gawas niini, tulo ka adlaw matag semana ang gigahin sa Senado alang sa impeachment trial. Tungod niini, nagtuo ang Blue Ribbon chair nga mas paspas pa ang pag-usad sa kaso kung kini idala na sa Ombudsman.
