Giisip nga “armado ug delikado si Senador Ronald “Bato” dela Rosa ubos sa kasamtangang standard protocols taliwala sa nagpadayon nga pagpangita kaniya aron isilbi ang warrant of arrest nga gi-isyu sa International Criminal Court (ICC).
Mao kini ang tubag ni National Bureau of Investigation (NBI) Director Melvin Matibag sa dihang gipangutana kung ang senador giisip na ba nga armado ug delikado human siya mibiya sa Senado sayo sa buntag niadtong Mayo 14 human sa usa ka insidente sa pagpamusil ug ang iyang nahimutangan wala pa gihapon mahibaloi hangtod karon.
Gipasabot sa hepe sa NBI nga kabahin sa standard protocol mao nga kung mohimo sila og operasyon o mogukod sa usa ka pugante, ilang giisip siya nga armado ug delikado.
Ang NBI nagporma na og team aron mangita sa senador, kinsa giisip nga usa ka pugante. Gi-assign usab ni Matibag ang ilang mga personahe sa district ug regional offices sa NBI aron mohimo sa ilang kaugalingong monitoring sa ilang mga hurisdiksyon alang sa posibleng mga lead nga mahimong magtudlo sa nahimutangan sa senador.
Nagtuo si Matibag nga nahibal-an ni dela Rosa kung giunsa paglihok ang mga law enforcement ug kung giunsa siya pagsubay sukad siya nagsilbi nga hepe sa Philippine National Police (PNP).
Nanawagan usab ang hepe sa NBI sa senador nga mosurender nga malinawon ngadto sa mga awtoridad.
