Mas gipahugtan pa sa Philippine National Police (PNP) ang seguridad sa Shariff Aguak, Maguindanao del Sur, human sa kaguliyang nga nahitabo milabayng Oktubre 8, ang kataposang adlaw sa pag-file Certificate of Candidacy sa mga kandidato.
Base sa report nga gipagawas sa PNP, usa ka community watchman ang namatay ug unom ang nasamdan human sa komosyon.
Base sa imbestigasyon, nagsugod ang kasamok human gikaingong wala aprobahi sa Commission on Elections ang kandidatura sa usa ka aspirante pagka bise mayor tungod sa pipila ka komplikasyon sa balaod.
Human niini nagkagubot ang mga supporters sa maong kandidato ug girespondehan gilayon sa mga sakop sa Shariff Aguak Municipal Police, Police Regional Office-Bangsamoro Autonomous Region, ug ubang local security forces.
Human sa maong kagubot, nagdugang og mga personahe ang PNP sa pipila ka posibleng flashpoint area sa tibuok Shariff Aguak.
Sa pagpaklaro usab ni Comelec Chair George Erwin Garcia, adunay warrant of arrest ang maong personahe nga buot mokandidato pagka-bise mayor.
Human ma-verify ang nahisgutan, nasuta sa secutiy force nga nag-atubang diay kini og warrant busa gi-serve dayon samtang nisulay pagsang-at sa COC nga nakapasuko sa iyang mga supporter.
Gipasabot pa ni Garcia nga walay COC ang nahisgutang kandidato kondili ang certificate of nomination and acceptance (COC) lamang gikan sa usa ka political party, maoy iyang gibitbit hinungdan nga wala siya hatagi.
